فيها كلام قباحة - الڨحّاف أوّل متضرّر بزيادة الاسعار

Caricature originale de Olivero que j'ai adapté à l'actualité tunisienne.
Toutes mes excuses à l'artiste.

واجبات رجل الأمن التونسي، الضحك لا

- مظهرك وسلوكك يجلبان لك الإحترام، فأحرص على نظافتهما.

(عندي طريقة أخرى نستعمل فيها باش تجلبلي الإحترام، كان ما تراوش مانع)

- كن يقضا دائما، وأسهر على إحترام القانون.

(شكون، أنا ؟ لازم ؟)

- بادر بالتحيّة عند كل تدخلّ.

(عملت التحية قبل ما ندخلو في مريم في عين زغوان، ياخي هيّ هيّ وشكاو بيّة، جاب ربّي عندي عروفاتي تكذّب ونقابة التدافع عليّا)

- حكّم العقل وتجنّب الظلم، وتحاش تجواز حدود السلطة.

(عمري ما ظلمت حد ! كونشي كي نستحق شوية صرف نولّي نتلوكش، ولاّ كي واحد ما يعجبنيش، ولاّ وحدة تعجبني...) 

- كن رصينا وثابتا وحازما في تطبيق القانون.

(ما نيش مقصّر مالناحية هذيكة، كان لزم ندوّرها تصرفيق وبونية وتشفير باش يتطبّق المغبون، سامحني، القانون)

- لا تعامل الناس بغلظة، وأعلم أنك في خدمتهم.

(ما عندكش فكرة قدّاش نعامل فيهم بليّنة، أما الناس ولاّو فينو ياسر، دوب ما تمسّهم يا خشمهم يتكسّر، يا عينهم تزراق، يا سنّيهم الطيح، فمّا شكون حتّى يموتلنا... أما والله خاطينا، إسئل عروفاتي والنقابة توّة يقولولك)

- إبتعد عن الجدل و إختصر الكلام (ما فيها باس تربريبة صغيرة كون مام باش نوقّفهم عن حدهم)

- وإختم تدخلك بأداء التحيّة (حتّى كي تبدى يدّي معبّية؟)

ربّي يهدي، أما مش برشة

من وحي واقع خيالي 

يوم 1

شبيك توَة مروّح ؟ ريحتك بالشراب يا مقصوف الرقبة !يرزيني فيك

يوم 30

آه سكران كي العادة ؟ يا ربَي آش عملت في حياتي باش جاني طفل عايق هكة ؟ صحَة ليها زينب جارتي، ولدها أمين مصلّي عالنبي عليه، صلاة وعبادة

يوم 60

وين كنت؟

كنت مع أمين

واش خصّك إتبّعوا وتولّي كيفو، ربي يهديك يا وليدي

يوم 100

مشيت للجمعة ليوم ؟ على شنّوة الخطبة ؟

عذاب القبر وحكم الجهاد

...آه

يوم 140

  يرحم والديك يا زينب، ولدي ملي ولّا يخالط في أمين ولاّ يشرّه، مالدار للجامع ومالجامع للدار، ماعادش يخالط أصحاب السوء وحتّى مالبارابول ماعادش نلقاه عالأسترا كي نحل التلفزة الصباح، ربّي يسهّلو في خدمة فيسع خلّي يعاونا

خليني ساكتة يعيّشك، أيمن محيّرني، صحابو سمالله لعظيم وين نشوفهم لحمي يزوغب.. ولاّ يعدي ساعات ليلة ولا ليلتين ما نعرفش عليه وين وماهو مضويلي شي

يزّي يا بنتي صلّي عالنبي، إحمد ربي إلّي ولدك يخاف ربّي وماعندوش الزايد، يزّي مالتهلويس يعيّشك

هاني نحمد فيه

يوم 200

وين بتت البارح يا سيف

مع إخوة

مع إخواتك ؟

 مع صحابي

المرّة الجاية قلّي باش ما نتقلّقش عليك يعيّش ولدي

تهنّى أمّي، هبّط يدين مريولك مليح وريقل خمارك، أيمن وبعض الإخوة باش يباتوا الليلة في بيتي

نحضرلكم حويجة تاكلوها ؟

لا يعيشك، أستر روحك

ميمتك ولاّت عزوزة ما فيها طمع ما تخافش

أستر روحك

باهي باهي، ما غير كشّان

260 يوم

أما تعرف يا زينب، توة فهمتك، حتى من ولدي سيف تبدّل، كنت ندعيلو قبل بالهداية، توّة قريب باش ندعي للربّي ينقصّلوا منها شويّة، باش ما نقولش يرجع كيما كان قبل.. عالقليلة كان يبات في الدار ونعرفوا على شنوّة يمشي وشنوّة يجي

يوم 300

ربّي يلطف بينا وبتونس، ولّات لعباد تحوّس عادي بالسلاح في البلاد وتقتل في البراينية، تقولش عليها اللعبة متاع سيف "كول دوتي" ولا آش سمّاها ربي

لعباد معادش تخاف ربّي ولاّت، مانيش فاهمة وين ماشين

 يا مرى، موش ولدنا هذاكة إلّي يعدّيو فيه توّة في التلفزة؟؟؟

...ســـــــــــــــــــــــــــــــيـــــــــــــــــــــــــــــــــــــف