Nombre total de pages vues

mardi 13 décembre 2016

أعرف توجّهك السياسي، إختبار نفسي


1/ شنوة حوالك؟

- الحمد لله
- والله الحمدولله
- تاعب شوية أما الحمدولله على كل الحالات، بالله نلقاشي عندك 10 لاف نرجّعهالك 
الجمعة الجاية، أعطيني نومروك توّة نكلّمك كي نجي باش نرجعهملك
- أنا لاباس، أما برّة إسإل الزواولة إلي يخلصوا أقل من 10 د في النهار-


2/ وين كنت قبل 14 جانفي؟

- أتألم ولا أتكلم
- كنت صانع جوّي وأموري عال العال
- تولدت نهار 14 جانفي، بابا أسمو العدل وأمي إسمها حريّة
- وين كنت إنت قبل 14 جانفي؟


3/ أناهي أكثر شخصيّة صور متحرّكة تشبّهلك ؟

- ميكاي ماوس، خاطرك ميكاي وماوس في نفس الوقت
- سبونج بوب، النهار الكلّو وإنت تنوّح على تونس
- قرينط الشلواش، ديما تشلوش منّا ولا من غادي
- فولترون، خاطر في الإتحاد قوّة


4/ جماعة عنّقني، يعنّقوا بالحق ؟

- هوما يعنقوا بركة ؟؟ بوس وممارسة الفاحشة في الأماكن العمومية
- ويبعبصوا زادة، بالأمارة برشة عباد تقلّقوا
- شبعة تكحيل نهارتها
- أنا ضدّ التعنيق


5/ شنوة تعنيلك عبارة حقوق الإنسان؟

- المثليّة الجنسية
- دبوزة فنتا
- حريّة الإبحار في المواقع الإباحيّة
 - راضية


6/ رئيس الجمهورية القائد السبسي، قداش مزّال باش يعيش حسب رايك؟

- سي ديجا مات ودافنينو في قبر الطاهر حداد
- البجبوج هايلندر ما يموتش (highlander)
- ياخي موش نجيب الشابي رئيس الجمهورية؟؟؟
- كان جات الدنيا دنيا... خليني ساكت خير


7/ كي تقسم واحد على الأغلبية الصامتة، شنوة النتيجة؟

- مجموعة فارغة
- صفر فاصل اما مش الصفر فاصل إلي في بالكم
- نرمالمون يموت
- نعرف عمليّة حسابية وحدة هيا 1 + 1 = 1


8/ علاش تحرّم الشراب حسب رايك؟

- أستغفرلله
- صارو وقتها برشة حوادث متاع جمال نتصوّر
- العام إلي تحرّم فيه، السلعة ماكانتش في المستوى
- أ بون حرام؟!!! مافيباليش


9/ تتكيف الزطلة ؟

- إيماني هو زطلتي
- كان كي نسافر للماغوك ولاّ أمستغدام
- الزطلة هي إلي تتكيّف فيّا
- شطر رفاقي شدّوا الحبس من جرّتها، ما إنّجم كان نكون ضدّها


10/ شنوة رايك في بوتين ؟

- عميل أمريكا
- شي غيفارا زمانو، بركة برشة عباد ما يعرفوش
- نشكرو بكل حرارة على زفيتلانا وإيرينا إلي بعثهملي صبف السنا
- مش خايب أما خسارتو ني شويّة


11/ كي تتعارك حومة سنيّة كونترحومة شيعيّة، شكون يربح؟

- السنيّة بالطبيعة، على خاطر الملائكة تهبط معاهم. حاجة معروفة
- الشيعيّة بالطبيعة، ما شفتش آش يعملوا في رواحهم في العاشوراء ؟
- البشريّة
- الحومة الشيوعيّة


12/ وين حيّهم اللوز وشورو؟

- هما أرقى وأعلى من السياسة
- اللوز حلّ وكالة مضيّفين في الرقّة نظرا لخبرته وشورو جزّار في الموصل
- سامحني أما كميتي بالمدمس والسردينة
- حدّي حد الغاريبالدي، والحق ما شفتهمش غادي


13/ الإتّحاد العام للشغل

- كانوا خايبين ولاّو باهين
- كانوا باهين ولاّو خايبين
- أنا نحب نعرف كان أعوان الإتحاد عندهم نقابة إتدافع عليهم من ظلم عروفاتهم
- أنا مانيش ضدّهم


14/ ما معنى هذه الجملة؟ :عندما نفكر في الفشل، فإنه يصبح صديقنا. وإذا أجلنا اتخاذ القرار بصورة دائمة، فلن يتغير شيء. وكل ما نحتاج إليه هو أن نرغب في تحقيق شيء عظيم ثم نتقدم ببساطة لفعله. لا تفكر في الفشل لأن ما تفكر فيه يتحقق

- لحظة نعمل طلّة على صفحة ياسين العياري
- لحظة نعمل طلّة على صفحة جلال بريك
-عاودلي السؤال من فضلك
- تقصد فيّا نا ؟


15/ علاش شوارع تونس إمسّخة لها الدرجة ؟

- على خاطرها تعاني من مؤامرة صهيوماسونية للنيل منها ومن الدول العربية الأخرى والتستّر على نجاحاتهم وإكتشافاتهم
- ماهيش المسّخة يا المسّخ، وقبل ما تحل فمّك برّة نظّف عتبة دارك
- كي الحكومة ما قدرتش تخلق مواطن شغل جديدة، هانا نعاونوا بلّي إنجّموا
- يجب على الحكومة أن تستقيل


16/ بش تعمل فريق متاع كرة قدم وناقصك ملاعبي، شكون تجيب؟

- نجيب واحد يتبلنجا مليح
- نجيب واحد يشوط مليح
- نجيب واحد يراوغ مليح
- أنا ضد الكرة وهالريق الفارغ


17/ شنوة تشوف في هالتصويرة؟ 

- دبّوزة حبار تبزعّت على ورقة بيضا
- واحد يسوق في متور لابس صبّاط كلون، ساقيه محلولة ويديه مقصوصة
- ها ها ها شلّقت على روحك أدمين
- الرأسمالية كيفاش قاعدة تتفشّى في العالم كمرض السرطان


18/ شنوّة تبدّل حسب رايك في البوليس التونسي بعد 14 جانفي 2011؟

- ياقوت وليس بطاغوت
- يحيا الأمن الجمهوري حامي البلاد من الجرذان
- تالمون ولّى ناس طيّبة إلي ديما يحبّنا نكونوا فرحانين... وخاصة بيه
- البوليس زوّالي، ما إنجمش نكون ضدّو


19/ أحسن وضعيّة يلزمك تتوخّاها باش تنجح في حياتك

- السجود
- الركوع
- آنا الفوق
- الدجاجة


20/ إنت مع رجوع الإرهابيين من بؤر التوتّر إلي تونس؟

- علاش لا ؟ توانسة كيفي وكيفك
- في صنادق كونشي
- "بؤر التوتّر" ههههه
- بالطبيعة أنا ضدّ


إضغط هنا لمعرفة لونك السياسي


2 commentaires: